Furstlicher Durchlaucht etc. in Preussenn, meinemm hochgeliebtem hern unnnd freunde

Durchlauchterr, hochgebornerr furst, hochgeliebterr, gunstigerr herr und freundt. / Noch erbittung meynerr fruntlichn, willigen dienst / wunsche ich Ewer Furstlichen Durchlaucht ein glukseliges newjorr von Gote dem almechtigenn / und vil andere in götlicherr gnoden, biss uff Matusalemm zceite, zuvorannn etc.

Wie ich her komenn bin, / hab ich hie gefunden Ewer Durchlaucht diner, den edlenn Felix von Aldenn, / dennn ich gernn / aus solchemm langenn wege, / den er in Ewer Durchlaucht dienst vorbrocht, / in gutterr gesuntheit gesehen hab. / Und so er aus kayserlicher maiestet hove so an mich von guttenn hern und frundenn vorschribennn ist, / als der sich in Ewer Durchlaucht dienst erlich, / fleissig / und wol gehaltenn, / hab ich in ane meynerr eigenenn hanth schreibenn an Ewer Durchlaucht nicht mocht von mir lossenn. / Dieweil ich ouch in frembden hern und freunden / von Ewer Durchlaucht wegen / durch mein schreibenn befholenn, / wil sichs wol czymenn, in ouch Ewer Durchlaucht zu befhelenn, / nemlich so er noch seinemm vermugenn Ewer Durchlaucht uffrichtig und getreulich / in sochen fernen wegenn / gedint, / bittend in solcher dienst wold lossenn genissenn / unnnd uff disse meine vorschrifft / sein gnediger her wol seinn, / das ich ummb Ewer Durchlaucht alweg zuvorschuldenn pflichtig wil seinn / und mich hiemit in Ewer Durchlaucht, / die Goth der almechtig in langweriger gesuntheit und aller glukseligheit beware, / thu befhelenn. /

Datum aus meinemm hove Ploweise, / den V tag Ianuarii M D XXXV.

Ioannes, colmischer bischuff etc. mit eigener hanth