[De]m Hochwirdigestenn in Gott Fu[rste]nn unnd Herrenn, / herrn Ioanni vonn Gottes gnadenn / bischoff zu Ermlandtt, unserem gnedigesten herrenn

Hochwirdigester in Gott Furste, / Gnedigester Herr. /

Unsere demutige / bereytwillige dinste / sampt freuntlichem grues mit erbyttunge unnd wunschunge alles beheglichen willens / seint Euwer Hochwirdigesten Gnadenn alwege bevorann entpfholenn. /

Hochwirdigesten in Gott Furst, Gnedigsten Herr. /

Wir thuen Euwer Hochwirdigesten Gnaden demutiglichen zuwissenn, / das wir den 30 Iulii / dato dises brieffes / koniglicher maiestet unsers allergnedigen herr schrifftenn behendiget unnd entpfangen habenn / des inhalts / welcher (sonder zweiffel) gleichformig an Euwer Hochwirdigesten Gnaden durch seiner hohgemelten maiestet comornick / gelangende / ersuchet wirt werdenn / unnd dyweil wir danne erstlichen / unnd als sonderliche personen / ane vorbetrachtunge / radt unnd vorgehender bedenckung / der ander herren radten und stenden / nichtes wissen uns anzumossen / beantwertten koniglicher maiestet / oder hyrin zuberadtschlagenn. /

Auch in ansehunge / dyweil Euwer Hochwirdigesten Gnaden als oberster diser landen Preussen president ist, / so haben wir auff die zeit / vor radtsam unnd nottig / Euwer Hochwirdigesten Gnaden ...lichen hirinne zuersuchenn unnd dis alles heim zustellen / erachtet unnd im besten bey uns erwegenn. /

Bittende derohalben demutiglichen / wen Euwer Hochwirdigesten Gnaden mit gedochter koniglicher maiestet schrifften in kurcze ersuchet wurde, / das Euwer Gnaden / uns Euwer Hochwirdigesten Gnaden radt / guttduncken / meynung unnd hohes hyrin bedencken, / was zum besten dobey zubetrachten unnd wasserley gestalt hochgedochte maiestet beantwort mochte werden, / entdecken unnd uns myt zeuger dyses zu zuschreyben geruchete wasserley radt bedencken unnd meynung / Euwer Hochwirdigesten Gnaden / uns alden zustellende / mitteylen gnediglich wurde. / Wolden wir uns / neben Euwer Gnaden gutduncken gleichmessig / unser beantwortung koniglicher maiestet zuthun / wissen zuhalten.

Sinnt wir Euwer Hochwirdigesten Gnaden Gott dem almechtigen selig unnd gesundt seinem landt unnd lewten, / auch uns zu trost enthaltende / thuen entpfhelen.

Geben eylendt, den 30 Iulii im joer MDXLVII.

Euwer Hochwirdigesten Gnaden dinst unnd bereytwillige alzeit burgermeystere unnd radthmanne Konigl[icher] Stadtt Thorun