Reverendissimo Domino, domino Ioanni Dantisco episcopo Culmensi, serenissimi regis [Poloniae] oratori etc.

Salutem plurimam.

Dedi elapsis diebus ad te litteras, Reverendissime mi Domine, quas opinor te iam accepisse, propterea responsum illarum in dies seu potius in horas exspecto.

Reverendissimam Dominationem Tuam oro, tandem nos respiciat memineritque me et filiam tuam in maxima egestate et penuria hic agere potiusque vitam trahere quam vivere. Et quoniam mortales immortale odium servare minime decet, si tamen in me Reverendissima Dominatio Tua id habet, non redundet in miseram puellam, quae iam adulta, auxilio tuo ut cum maxime eget. Reverendissimam Dominationem Tuam oro item, dignetur ad me scribere, antequam curia imperatricis hinc decedat, nam postea non ita facile ad me litterae pervenient. Litteras mittito ad secretarium Gratianum, hospitem meum, qui memor tui multa beneficia in nos contulit.

Et valeat Reverendissima Dominatio Tua. Cui me humiliter commendo.

Vallisoleti, X Calendas Iunii.

Reverendissimae Dominationis Tuae humillima serva Isabella Delgada etc.