BCz, 1606, p. 392

Dem Erwirdigenn inn Goth unnserm besondernn liebenn Freundt unnd Nachtbarnn, herrnn Johanssen bischoffen zu Ermelandt

BCz, 1606, p. 391

Unnser freuntlich dinst zuvornn. /

Erwirdigerm Got besonder lieber Freundt und Nachbar. /

Wir habenn E(uer) L(ieb) schreibenn datirt Schmalein, den XII-ten Martii dieses itzigenn lauffendenn jares newlicher tag entpfangenn. / Unnd daraus wes dieselb des Golintzki halbenn ann unns geschriebenn vorstanden, / welchermassenn aber wir kö(nigliche) ma(iestet) zu Polann unnsernn gnedigen herrn unnd freuntlichenn liebenn ohaimenn, desgleichenn die loblichenn stende derselben Cronn widderumb beantwort / habenn E(uer) L(ieb) inligendt zuersehenn. / Unnd wiewoll wir gut fug unnd recht anderer gestalt mit berurtem Golintzki von wegenn seiner begangenenn ubelthathenn zuhandlenn, / so habenn wir doch hochgedachter ko(nigliche)r ma(ieste)t unnd derselbenn hochloblichenn stende furbieth angesehenn. /

Also das wir sie der letztenn bieth, / doch der gestalt das die guther nach lantleufftigem gebrauch, / dardurch denn dinnstenn damit nichts entzogenn / geschatzt werdenn / zugewehrenn und wilfarung zuthun gneigt. / Wyr schickenn auch E(uer) L(ieb) irem begernn nach des herrnn untercantzlers brieff hiemit widder. / Wellichs wir E(uer) L(ieb) uff ir gethanes schreybenn freuntlicher meynung nicht vorhaltenn wollenn. / Dann derselben iderzceit freuntlichen angenemen willenn zuertzeigen seint wir geneigt.

Dat(um) Konigsbergk, denn 24-t(en) Martii anno etc. im 40-t(en).

Von Gots gnaden Albrecht marggraff zw Brandenburgk, in Preussen, zu Stettin, Pommern, der Cassuben und Wenden hertzog, burggraff zu Nurmbergk und furst zw Rugenn manu propria subscripsit