Reverendissimo in Christo Patri et Domino, domino Ioanni Dei gratia episcopo Varmiensi, fratri et maiori plurimum observando

Reverendissime in Christo Pater et Domine, frater et maior observande.

Hoc momento, cum alteras litteras iam tradidissem baiulo, accepi has inclusas magnifici domini palatini Pomeraniae. Oblitus sum in prioribus litteris scribere consilium in negotio illustrissimi domini ducis Prussiae, nec nunc id licet festinanti ob discessum nuntii, posthac cum litteris Thorunensium scribam, tamen prima facie non displicet mihi consilium domini palatini. Iterum cupio Reverendissimam Dominationem Vestram valere.

Datae ut in prioribus litteris, die VI Iunii 1539.

Eiusdem Reverendissimae Dominationis Vestrae studiosiss[imus] Tidemannus Culmensis