Unnsernn freundtlichen grues unnd alles gutten zuvoran. Ersame, nhamhafftige herrnn, gunstige freunde. /
Der edel unnd ehrenfest herr ⌊Iohann von Werden⌋
, burggraff und burgermeister Ewer Erbarkeit mittels, / houptman zw ⌊Newenburg⌋, / unnser inn sonnderheit vertrawter, lieber freundt ist disse tage / von wegen sonderer freuntschafft mit sich habende etliche wichtige gescheffte von Ewer Erbarkeit an uns komenn, denn wir fast gern gesehen und gehort, / unnd mit im unnd denn
⌊ersamen von Elbing⌋, / die etliche von denn iren auch bey uns gehabt, / uns entslossen dermoss, wie Ewer Erbarkeit wirt haben verstandenn, / das ahn uns Ewer Erbarkeit zw wilfarn nichts ist abgangen und verbliben. Were auch unnot gewesen die gobe der kleinen muntze, / die wir zw widergeltung uns zw brengen gebeten, / welche ehr uns von Ewer Erbarkeit verehret. / Dieweil wir aber hiraus spuren und ermessen Ewer Erbarkeit zw uns freuntlichenn, geflissen willen und gemuet, / habe wir solchs zw dancke ahngenomenn / mit erbittenn / worinne wir Ewer Erbarkeit in einem vil grosseren furderlichen und nutzlich mugen sein / auch gleichmessig, / wie Ewer Erbarkeit in iren brive mit offenen worten uns unnd unser kirchen, / so der gestalt sich was begebe, / iren beystant zu sagen, / wollenn wir alweg unbeshwert unnd willig gefunden werdenn, / dann Ewer Erbarkeit, / die wir Gote dem almechtigen in sein gnad befholen, / unnd unnserm vaterlande vil ehre, nutz und guts wircklich und mit der that zw beweysen sein wir gentzlich geneigt. /
