... Ioanni Dantisco secretario et ... nostro sincere nobis dilecto

Sigismundus Dei gratia rex Poloniae, magnus dux Lithuaniae, Russiae, Prussiae, Mazouiae, dominus et he[res]

Magnifice sincere nobis dilecte.

Et res ipsa id exposcere videtur et tu frequentioribus petitionibus tuis summo studio a nobis contendisti, ut tam diuturnae istic morae et imbecillae valetudinis tuae rationem haberemus teque istinc revocaremus. Satisfecisti tu quidem nobis istic existens fide et studio tuo nec quicquam superest, quod in curandis istic negotiis nostris a te nobis praestitum non esset. Quocirca revocamus te istinc volumusque, ut visis his nostris litteris istinc te quam honorificentius et commodius potes, absolvas et huc ad nos recipias, quoque tibi per tot gentes et populos ituro securior transitus pateat, mittimus tibi litteras nostras publicae fidei. Scripsimus item ad serenissimum et christianissimum dominum Francorum regem, rogantes illius maiestatem, ut etiam litteris suis liberum ac securum commeatum per regnum et ditionem suam tibi concederet, quoniam mare et navigationem te vehementer perhorrescere ex litteris tuis intelleximus. Sed ne in curia caesareae maiestatis desit, qui res nostras, quae forsan posthac emergere possunt, curaret, mittimus istuc in locum tuum venerabilem Ioannem Levicium cantorem Plocensem, notarium nostrum et serenissimae coniugis nostrae dominae reginae mandamusque tibi, ut eum de rebus nostris, quas istic egisti et prout eas reliquisti, doceas desque operam, ut simul caesareae maiestati simul domino cancellario magno atque aliis, quibus eum notum esse eius referre arbitraberis, notum efficias. Facturus pro fide tua et gratia nostra.

Datum in Radom, die XXVIII Februarii anno Domini M-o D-o XXVIII-o, regni vero nostri anno XXII.

Sigismundus rex subscripsit