... et egregio viro ... [Ioanni] Dantisco utriusque iuris ... secretario et oratori ... nostro sincere nobis dilecto

Curia caesareae et catholicae maiestatis

Bona Dei gratia regina Poloniae, magna dux Lythuaniae, Russiae totiusque Prussiae etc. domina

Magnifice et egregie sincere nobis dilecte.

Multo iam tempore exacto, litteris nullis tuis refectae, dubia spe rerum nostrarum distrahimur nec scimus, quid interea fecerit Strenuitas Tua, id autem eandem ignorare nolumus, quod dominus Alarcone, castellanus Barensis nec substitutus, secundum commissionem et mandatum sacrae caesareae maiestatis nullam hactenus nobis fecit fidelitatis suae iuratoriam professionem et oboedientiam, et cum suus substitutus cum litteris caesaree maiestatis nostro nomine desuper requisitus fuerat, respondit se id a suo castellano non habere in commissis nec id facere debere vel posse sine sua scientia et voluntate.

Itaque agat Strenuitas Tua, si nondum nos voto nostro potimur, ut saltem interea ille castellanus, quem ibi esse praesentem audimus, in manibus Strenuitatis Tuae hoc ipsum praestaret iuramentum et mandatis ac commissis sacrae caesareae maiestatis satisfaceret, vel prout commodius noverit Strenuitas Tua, sic hoccine negotium, ita ut opus sit, perficiat, quodque Alarcone, si ibidem iuramentum praestare noluerit, committeret hoc et mandaret suo substituto litteris suis, quas vel illi mittatis.

Non dubitamus iam vos ibi intellexisse de casu infortunatissimo serenissimi domini regis Hungariae et Bohemiae, et quid ei acciderit in proelio cum Thurcarum imperatore habito, iamque haec regna fore in maximo periculo, ni sacra caesarea maiestas provideret. Et quid tandem illa maiestas facere deliberat, maturius est consulendum. Quae omnia nobis perscribat Strenuitas Tua.

Et bene valeat Strenuitas Tua.

Datae Cracoviae, XX Septembris 1526.

Ad mandatum serenissimae reginalis maiestis proprium